CEBU, Philippines - Aduna unya’y kahigayonan ang Sugbuanong kickboxer nga si Joel Zaspa nga mohatag sa Pilipinas sa labing unang Olympic gold medal.
Kini human sa iyang malampusong kampanya sa Asian Beach Games diin midaog siya og bronze medal sa Muay Thai competition didto sa Phuket, Thailand.
Ang 25-anyos nga si Zaspa, kinsa giisip nga aduna nay taas nga kasinatian sa kickboxing ug mixed martial arts dinhi sa Sugbo, mihatag og dungog sa nasud human siya midaog sa bronze medal bisan pa’g adunay 46 ka nasud nga misalmot sa maong torneyo.
Gawas pa niini, si Zaspa usa ka last minute pick-up alang sa Philippine Team dihang nadiskubre siya sa ‘Bakbakan sa Sugbu’ fight card, usa ka senemana nga grassroots tournament nga gipasiugdahan sa Yaw-Yan ArDigma Cebu Martial Arts Inc. uban sa Cebu City Sports Commission.
“Actually less than one month lang siya (Zaspa) nakapaghanda dahil huli na naming siyang nadiskobre doon sa palaro ni Master Ekin (Caniga) na Bakbakan sa Sugbu nung November,” matud pa ni Philippine Muay Thai national coach Edzel Ngina.
“Pero kahit ganun nakita talaga ang tapang, ang determinasyon ng bata na manalo at doon ako bumilib sa mga Cebuano.”
Matud ni Ngina nga ang International Federation of Muay Thai Amateur mihatag kanila og duha ka luna alang sa Olympics ug daku ang purohan nga usa si Zaspa sa mga morepresentar sa nasud sa 2016 Rio de Janeiro Olympics.
Sa iyang bahin si CCSC chairman Edward Hayco naglaum nga ang kalampusan ni Zaspa magsilbe nga inspirasyon sa mga batan-ong atleta nga maningkamot aron makahatag usab og dungog sa nasud.
“We have dedicated the Cebu City Sports Institute to focus on events like boxing, weightlifting, Muay Thai and MMA which raise many eye brows, but we believe in the sports and the training for our young athletes,” matud pa ni Hayco.
Sa laing bahin, si Ken Caniga, 10-anyos ug usa sa mga produkto sa CCSC grassroots program mosuway usab og sakmit sa gold medal sa Muay Thai event sa Batang Pinoy National Finals sunod semana didto sa Bacolod City.
Kun hatagan og maayong kapalaran, si Caniga makakuha og luna sa Philippine Youth Team nga moduwa alang sa nasud sa World Youth Championship sa Agosto sunod tuig didto sa Thailand. (BANAT NEWS)