CEBU, Philippines – Mi-rally ang team Alit’z sa katapusang dos minutos sa fourth quarter aron moiskor og laing daog batok sa Bulldog, 62-56 sa Sunday.Com Basketball Club niadtong Domingo didto sa Barangay Ibabao-Estancia gym, Mandaue City.
Tulo ka players ang mikulit og double figures alang sa Alit’z nga pirmeng naggukod gikan sa pagsugod sa duwa.
Ang Alit’z nga adunay 3-0 win-loss record gipangulohan ni Gio Antigua sa iyang 13 puntos, gisundan nilang Richie Malahos ug Dodoy Grafe nga adunay 11 ug 10 puntos matag usa.
Ang basket ni Grafe sa nahabiling 1:48 sa final period maoy mihatag sa Alit’z sa labing unang labaw, 56-54 ug wala na sila molingi pa sukad niadto.
Bugtong si Diosdado Apa Sr. lang ang nakaiskor og double figures alang sa nasukarap nga Bulldog pinaagi sa iyang 13 puntos.
Ang Bulldog nagtangag karon og 1-2 nga baraha ning maong liga nga gipaluyohan sa Visayan Electric Company (VECO) pinaagi sa ilang community relations manager Eric Ching ug sa International Pharmaceutical Inc. (IPI).
Gisuportahan sab ni Engr. Ray Gallego, ang mga duwa gidumala ni Sunday.Com BC president Camelo ‘Tata’ Nadera sa abag nilang Randy ‘Buboy’ Zanoria Sr. Baguio ug Ian Armero. (BANAT NEWS)