CEBU, Philippines – Nasakmit sa University of the Visayas (UV) ang titulo sa Passerelle Division sa SBP-Passerelle Visayas Regional Finals 2014 human nila gipilde ang Hua Siong College-Iloilo, 57-35 didto sa Roxas City.
Ang UV kinsa gipangulohan ni Denzel Sabroso maoy nagkontrolar sa duwa gikan sa sinugdanan. Si Sabroso maoy miiskor sa tanang 12 puntos dihang mihimo’g 12-2 run ang UV aron molabaw og daku didto sa second quarter. Ang UV nakahimo sab og siyam ka three-pointers.
Si John Gonzaga miamot og nuybe puntos alang sa UV.
Sa SBP division, naka-eskapo ang Ateneo de Iloilo batok sa University of San Carlos aron sakmiton ang korona.
Ang USC unta maoy kanunay naglabaw sa maong duwa, apan mikolapso sila sa uwahing bahin sa fourth period hinungdan sa ilang kapildihan.
Ang UV ug ang Ateneo de Iloilo maoy morepresentar sa Visayas sa national finals sa Disyembre 13-14 nga anhi ipahigayon sa Sugbo didto sa Magis Eagles Arena sa barangay Canduman, Mandaue City. (BANAT NEWS)