CEBU, Philippines - Nakatangag dayon og daog ang Warhawk human nila gibihag ang SM Appliance, 66-44 sa Zaldy Lumapas Inter-Company basketball tournament niadtong Domingo didto sa Barangay Umapad gym, Mandaue City.
Ang Warhawk sa Popular Feedmill Corp., igo lang milabaw og tres puntos, 28-25 paghuman sa unang 10 minutos sa duwa. Apan sa second quarter, ang Warhawk ubos ni coach Ranulfo Alivio milusad og full-court trapping defense aron bingaton ang labaw ug didto na nila hinay-hinayi og lubong ang SM Appliance.
Pwerte sab ang pagpanginit nilang Michael Lapinid ug Junriel Lumapas, kinsa parehong mikabya og 10 puntos alang sa Warhawk ni team manager Rey Geverola ug team consultant F.J. Jurado.
Ang Warhawk nga maoy kampiyon sa Lancers Security Agency basketball tournament ning tuiga, malaumon gihapon nga makasud sa finals tungod sa grabe nilang preparasyon ning maong torneyo.
PUNTOS MATAG USA
WARHAWK (66) – Lapinid 10, Jun. Lumapas 10, Montealto 8, Cuyno 6, Richmond 6, Jho. Lumapas 6, Dionson 6, Bartido 4, Entice 2, Campo 2, Maluya 2, Cantina 2, Wendell Atillo 2.
SM APPLIANCE (44) – Enoc 12, Chavez 10, Mata 8, Purisima 6, Panero 4, Sanchez 4. (BANAT PALARO)