CEBU, Philippines – Naangkon sa Shangrila-Mactan ang Game-1 human midaog batok sa Sports City, 82-68 sa “best-of-three” finals series sa Inter-Company division sa Lapu-Lapu Basketball League sa miaging gabii didto sa Lapu-Lapu gym, dakbayan sa Lapu-Lapu.
Si Dante Pagobo maoy nagdala sa duwa diin mirehistro siya’g 10 puntos, apan si Tyoy Almacin maoy topscorer sa kadaugan pinaagi sa iyang 23 puntos.
Ang Shangrila nga maoy nikontrol sa kinatibuk-ang duwa, nagkinahanglan na lang og usa ka daog aron hingpit nilang maangkon ang gihandom nga titulo.
Ang nagkagidlay nga Sports City gipangulohan ni Ron Niñel, kinsa mikadlit og 15 puntos, gisundan ni Riel Ponce sa iyang 13. Sila si Jun Linao ug Raymond Dablo mitampo’g 11 ug 10 puntos matag usa alang sa Sports City nga wala gyud makatilaw og labaw. Sa laing bahin, ang Lanlyns miabante na sa finals sa Open division human midaog batok sa Rollway, 100-96.
Si Jojo Tangkay mikulit og 39 puntos, samtang si Ferdinand Lusdoc mitimbre’g 18 puntos aron pangulohan ang Lanlyns, kinsa naggukod gikan sa pagsugod hangtod sa tunga-tungang bahin sa fourth quarter. Ang Lanlyns diha na nilabaw sa iskor nga 83-82 sa nahabiling 5:18 sa final period ug gikan niadto sila ang nidiktar sa duwa hangtod nahurot ang oras. (BANAT NEWS)