Bulahan o swerte kaayo kitang mga Sugboanon kay anhi gyud sa atong nataran masaksihan ang pagtakos ug pagtinaktakay sa walo sa labing maayong collegiate teams sa tibuok nasud kinsa tinguhang mulangkat sa titulo sa Philippine Collegiate Champions League kon PCCL.
Ang Sugbo maoy napiling host sa lima ka adlaw nga PCCL Elite Eight Series-Cebu Leg diha sa Cebu Coliseum diin atong makita sa lianwas ang mga collegiate players ilabi na kadtong tua sa Manila nga anha lang kanunay nato makita sa telebisyon.
Alang kang PCCL chairman Rey Gamboa, usa ka makasaysayanon ang pag-host sa dakbayan sa Sugbo sa lima ka adlaw nga PCCL Elite Eight Series Cebu Leg nga gidala dinhi sa labing unang higayon sulod sa 12 ka tuig.
Magsugod kini karong Huwebes, Nobiyembre 13 ug matapos unya sa Lunes, Nobiyembre 17.
Walay tinuoray nga basketball fan ang dili malipay kung anhi sa ilang tugkaran mopakita sa ilang abilidad ang mga players sa UAAP Season 77 champion National University Bulldogs, ang runner-up nga Far Eastern University Tamaraws, ang kampiyon sa NCAA Season 90 ang San Beda College Red Lions, ang runner-up nga Arellano University Chiefs ug ang wala pa hisayri nga representante sa Luzon-Metro Manila nga matapos karong adlawa didto sa Tanauan City, Batangas.
Pormal nga gilusad ang Elite Eight Series dili pa lang dugay atol sa usa ka press conference didto sa Hotel Fortuna sa dan Borromeo ning dakbayan nga gitambongan sab nilang Cebu Schools Athletic Foundation, Inc.(CESAFI) commissioner Felix O.Tiukinhoy, Jr. deputy commissioner Danny Duran, University of Cebu Webmasters team manager Atty. Baldomero Estenzo, University of San Carlos Warriors team consultant Julian Macoy, ang bag-ong coach sa University of the Visayas Green Lancers nga si Gary Cortes. Dayag na lang sab nga usa sa mitambong mao ang tag-iya sa Hotel Fortuna nga si Lorenzo "Chao" Sy kinsa commissioner sa Cebu City Sports Commission ug maoy mirepresentar kang Mayor Michael Rama tungod kay usa sa mga sponsors ang city government.
Maoy naandan sa PCCL nga adto himuon ang Elite Eight ug ang final Four sa Metro Manila kay dili lalim ang pagdala dinhi sa Sugbo sa mga ekipo alang sa pag-broadcast live sa matag adlaw nga resulta.
Matud pa ni Gamboa nga angayan magpasalamat ang mga Sugbuanon nilang Tiukinhoy ug Estenzo kinsa maoy kanunay naghangyo kaniya nga dad-on sa probinsya ang Elite Eight nga mahatagan na og katumanan ning semanaha.
Ang lima ka teams sa Manila makingsangka sa top three teams sa CESAFI nga mao ang 2014 champion Southwestern University Cobras, runner-up University of San Carlos Warriors ug third placer University of the Visayas Green Lancers.
Ang walo ka teams bahinon ngadto sa duha ka brackets. Ang Group A pagalangkuban sa NU Bulldogs, Arellano, USC Warriors ug sa Luzon-Metro Manila champion samtang ang mulangkob sa Group B mao ang San Beda, SWU Cobras, FEU Tamaraws ug UV Lancers.
Ang champion team sa PCCL makadawat og 800 mil pesos, ang second placer 400 mil pesos, ang third placer 300 mil pesos ug ang fourth placer 100 mil pesos.
Unang magsangka karong Lunes mao ang Cobras batok sa Luzon-Metro Manila champion ug mosunod ang duwa tali sa FEU batok sa USC Warriors.
Dunay pasidungog alang sa Finals MVP, Mythical Five, Best Coach, Best Referee ug Model National Collegiate Player of the Year award.
Ang tickets alang sa maong torneyo ibaligya sa 40 pesos alang sa gen. admission, 80 pesos alang sa upper box, 150 pesos alang sa lower box ug 200 pesos ang stage.