CEBU, Philippines – Pabilin nga pakyas ang Blackwater Elite sa pagsakmit sa labing una nilang daog sa PBA human sila gilubong buhi sa GlobalPort Batang Pier, 87-70, kagahapon sa PBA Philippine Cup didto sa Smart Araneta Coliseum.
Ang Blackwater nagsolo karon sa ilawum nga bahin sa standing sa ilang ngil-ad nga 0-5 win-loss record.
Sikit ang duwa sa unang duha ka kuwarter diin naglabaw lang og singko puntos ang GlobalPort, 45-40, apan wala na kahimo og diskarte ang Blackwater sa second half.
Sa pagpangulo ni No.1 pick Stanley Pringle ug Alex Cabagnot mitukod sila og 12 puntos nga labaw, 58-46 sa sayes minutos sa third period.
Mibanat usab si Ronjay Buenafe sa sayung bahin sa final period diin gipalapdan sa GlobalPort ang labaw 71-53.
“Nag-deliver yung mga rookies namin. Sana magtuloy-tuloy na ito,” matud pa ni GlobalPort coach Pido Jarencio. Ang Batang Pier mipalambo sa ilang record sa 3-2.
Ang rookie sa Batang Pier nga si Anthony Semerad mao ang gibayaw nga ‘Best Player of the Game’ sa iyang 16 puntos lakip na niini ang duha ka three-point shots. (BANAT NEWS)