CEBU, Philippines - Moparada og bag-o ug karaan nga mga atleta ang University of San Carlos-Basic Education (USC-BED) sa ilang kampanya alang sa “back-to-back” championships sa 24th Cebu City Olympics nga mosikad karong adlawa diha sa Cebu City Sports Center (CCSC).
Ang duha ka weekends nga kompetisyon pormal nga gibuksan kagahapon nga gitambongan ni Cebu City Mayor Mike Rama ug Vice Mayor Edgardo Labella.
Wala masayod si USC sports coordinator Saturnino Mayormita sa ilang mga kahigayonan pagpanalipod sa ilang korona. Ang USC mopadala og mga entrante sa halos tanang event lakip na ang demonstration sports gawas lang sa wushu.
Ang USC maoy bugtong nagbarog isip sakop sa Cebu Schools Athletic Foundation Inc. (CESAFI).
Sa laing bahin, ang public schools ug ubang non-CESAFI member schools gibuak ngadto sa walo ka units gikan sa North ug South districts.
Ang mga events nga tigian mao ang athletics, swimming, scrabble, badminton, boxing, dancesport, football, karatedo, gymnastics, archery, arnis, baseball, basketball, chess, tennis, table tennis, taekwondo ug volleyball. Sa demo sports, mao ang wushu, billiards ug wrestling.
Ang top performers sa multi-sports competition maoy morepresentar sa siyudad sa Central Visayas Regional Athletic Regional Meet sunod tuig.