CEBU, Philippines – Miiskor og daog ang GlobalPort Batang Pier dihang ilang gipilde ang Kia Sorento, 84-79 kagabii sa PBA Philippine Cup didto sa Smart Araneta Coliseum.
Sa maong kadaugan, mas mihayag ang kaugmaon ni Batang Pier coach Pido Jarencio nga magpabilin sa koponan dihang gidungog nga ilisan siya tungod sa ngil-ad nga sugod sa GlobalPort sa season.
Dili sayon ang kadaugan sa GlobalPort tungod kay naglabaw ang Kia sa first half, 42-34 dihang miarangkada sila si Neil Cervante ug Hans Thiele. Apan nakuha sa GlobalPort ang momentum sa second period ilabi na nga nanginit sila si Ronjay Buenafe ug duha ka rookies nga sila si Stanley Pringle ug Anthony Semerad nga mihatag sa ilang koponan sa 69-64 nga labaw.
Si Buenafe maoy topscorer sa GlobalPort sa iyang 19 puntos, samtang si Thiele sa Kia nga miiskor sab og 19 puntos. (BANAT NEWS)