CEBU, Philippines - Gipaboran si two-division world champion Donnie ‘Ahas’ Nietes (33-1, 19KOs) nga modaog sa nagsingabot niyang WBO light flyweight title defense batok ni Mexican challenger Carlos ‘Chapito’ Velarde (26-3, 14KOs) sa main event sa “Pinoy Pride 28: History in the Making” fight card sa Nobiyembre 15 didto sa Pacific grand ballroom sa Waterfront-Cebu City Hotel and Casino.
Apan si Nietes, kinsa mohimo’g kasaysayan miingon nga dili siya mokompiyansa ug wala niya isipa si Velarde nga hinay nga kontra.
“Dili ko mokompiyansa tungod kay naa siya’y (Velarde) rank sa WBO mao akong tan-aw lig-on gyud siya,” matud pa ni Nietes kinsa nagtinguhang mobuak sa rekord ni kanhi Cebuano boxing great Gabriel ‘Flash’ Elorde isip ‘longest reigning Filipino world boxing champion’ sud sa pito ka tuig ug tulo ka buwan.
Nakita ni Nietes nga usa ka marunong nga boksidor si Velarde ug tuyo niyang modaog batok sa Mehikano sa dili pa siya mobiya sa 108 lbs. division. Si Velarde miaway na kaniadto alang sa WBA minimumweight title , apan napilde pinaagi sa fifth round TKO batok Japanese Ryo Miyazaki niadtong Agosto 2013 didto sa Osaka, Japan.
Kini ang katapusang away ni Nietes sa light flyweight division sa dili pa mosaka ang 32-anyos nga boksidor ngadto sa 112 lbs. class. Si Nietes nagtinguha sab nga moaway alang sa WBO flyweight title batok ni Mexican champion Juan Francisco Estrada. (BANAT NEWS)