CEBU, Philippines – Misamot ang kalbaryo sa Blackwater Elite dihang gipahamtangan sila sa ikatulo nilang sunod-sunod nga pilde sa PBA Philippine Cup kagahapon didto sa Smart Araneta Coliseum.
Ang Blackwater napilde sa Meralco Bolts, 83-75 sa overtime.
Ang Meralco nakigsawo na karon sa No.1 spot uban sa Barangay Ginebra San Miguel ug San Miguel nga aduna nay 2-0 record.
Miratsada ang Meralco sa third period sa pagpangulo nilang Cliff Hodge ug Reynel Hugnatan aron moposte’g 58-43 nga bentaha. Apan mi-rally ang Blackwater sa fourth quarter ug hinay-hinay nga misikit hangtod nga nakatabla kini, 70-all human sa tres ni Bam-Bam Gamalinda sa katapusang 14 segundos nga naghatod sa duwa ngadto sa overtime.
Sa dugang singko minutos, wala na mokompiyansya pa ang Meralco ug mihimo kini’g mga kausaban sa duwa. Ang sunod-sunod nga tira nila ni Mike Cortez ug John Wilson maoy nakapalubong sa Blackwater. (BANAT NEWS)