CEBU, Philippines – Usa ka semana human sa ilang engkwentro alang sa Cebu Schools Athletic Foundation, Inc. title series, magbagat na sab sa laing torneyo ang Southwestern University Cobras ug ang University of San Carlos Warriors--niining tungora, adto na sab sila mag-showdown sa 10th Asian University Basketball Championship (AUBC) Cebu Province Collegiate Cup.
Nasakmit sa Cobras ang unang luna sa finals human ilang gipilde ang University of the Visayas Green Lancers pinaagi sa pagkulit og 81-70 sa miaging gabii didto sa USC gym. Didto sa Bogo, midaog sab ang Cobras sa iskor, 61-60 niadtong Oktubre 22.
Sa laing bahin, miabante sa finals ang Warriors human ilang gilubong ang Myongji University gikan sa Seoul, South Korea sa iskor, 92-74.
Ang knockout finals tali sa Cobras ug sa Warriors gipahigayon kagahapon didto sa Cebu City Sports Institute sa barangay Sawang Calero duol sa simbahan sa San Nicolas.
Sa kanunay, si Landry Sanjo maoy gisaligan sa opensa sa Cobras diin miposa siya'g 23 puntos aron pangulohan ang iyang team samtang midugang og 16 puntos si Mark Jayven Tallo ug miabuno silang Daryl Goloran ug Jovanie Luz og 12 ug 10 puntos matag usa.
Si Alwin Aguirre maoy nangu sa Lancers sa iyang 13 puntos samtang midugang og 10 puntos si Jan Monic Soliva.
Ang Warriors sa laing bahin, gipangulohan sa ilang Cameroonian import nga si Shooster Olago kinsa mibahog og 31 puntos ug ang iyang Congolese partner nga si Espoir Toyambi ug ang point guard nga si Kiefer Lim miambit og 10 puntos matag usa:
Upat ka South Koreans ang mihimo'g double figures pinangulohan ni Ju Kimwan sa iyang 18 puntos.
Ang Lancers ug ang Myongji maoy nagsangka alang sa ikatulong pwesto. (GGM)
hly misakmit sa liderato
Nasakmit sa HLY team ni Atty. Flor Yosores ang solong liderato human ilang gipakgang ang Perez Trucking sa iskor, 85-76 kagahapon sa nagpadayon nga Golden Dribblers Basketball League (GDBL) didto sa Pardo Sports Complex.
Sa unang duwa, midaog ang Aulga Dormitory batok sa McMill sa iskor, 97-84.
Sa laing duwa, midaog sab ang Team Rama batok sa Tisa sa iskor, 110-84 samtang midaog ang Power 40 batok sa Punta Princesa aron pahamtangan sa ilang sagunson nga ika-unom nag pilde ang nauwahi, ang bugtong team nga wala pa makatilaw og daog hangtod ning tungora.
Sa makausa pa, si Ramon Ceballos lang gihapon maoy nangu sa HLY sa iyang 18 puntos samtang midugang og 14 puntos si Andot Fuentes.
Sa laing duwa, unom ka players sa Aulga Dormitory ang mibahog og double figures pinangulohan ni Gaga Cabanilla sa iyang 17 puntos. (GGM) (BANAT NEWS)