CEBU, Philippines – Lig-ong depensa ug preparasyon maoy naghatag sa University of Negros Occidental-Recoletos (UNO-R) Mustangs og 75-69 nga kadaugan batok sa Holy Trinity College Wildcats gikan sa General Santos City sa ilang sangka sa elimination phase sa Philippine Collegiate Champions League (PCCL) kagabii didto sa Cebu Coliseum.
Ang point guard nga si Coleen Jude Testa, kinsa maayong nakaapud-apod sa bola maoy nangu sa Western Visayas regional champion nga Mustangs sa iyang 20 puntos. Ang Mustangs, makigsangka sa CESAFI fourth placer University of San Jose-Recoletos Jaguars karong gabii. Ang modaog sa duha maoy makigsangka batok sa third placer University of the Visayas Green Lancers. Adunay dakung posibilidad nga magbagat pagbalik ang Jaguars ug ang Green Lancers alang sa PCCL elimination phase. Si Christopher Macaslang, ang labing beterano sa Wildcats, mibahug og 17 puntos aron pangulohan ang napildeng koponan. (BANAT NEWS)