CEBU, Philippines – Gipangpilde sa Goldberry-Iloilo Hotel ug sa RDAK Transporters ang tagsa-tagsa nilang karibal sa Game-3 aron maghari sa 2014 Sacred Heart Ateneo Alumni Basketball Athletic Association season nga giuloha’g The Avenir SHAABAA Cup sa miaging gabii didto sa Magis Eagles Arena sa Sacred Heart School-Ateneo de Cebu sa barangay Canduman sa Mandaue City.
Si Jeremy Huang miposa’g 21 puntos aron pangulohan ang Goldberry-Iloilo Hotel nga milangkat sa Division A title, samtang ang RDAK mipilde sab sa Chick@Phil 89 sa iskor nga 57-41 aron sab langkaton ang korona sa Division B.
Laing tulo ka players sa Goldberry nga silang Robert Gilo, Dave Lim ug kanhi PBA cager nga si Joel Co ang miiskor sab og double figures.
Nangigo unta pag-ayo ang kanhi tirador sa UC Webmasters nga si Moncrief Rogado, apan ang iyang 19 puntos dili igo nga mobaswat sa iyang team. Gawas kang Rogado, lain sab niyang tulo ka teammates ang mibahog og double figures nga silang Kyle Valmoria mihipos og 15 puntos, samtang sila si Daryl Tan ug Christopher Consunji adunay 10 puntos matag usa.
Sa laing bahin, si Charleson Sia maoy nangu sa RDAK Transporters sa iyang 12 puntos, gisundan nilang Boylit Gillamac ug Anthony Ngujo nga parehong miiskor og 10 puntos. Bugtong si Mark Guanzon lang ang nakahimo’g double figures alang sa Chick@Phil sa iyang 11 puntos. (BANAT NEWS)