CEBU, Philippines – Ang two-division world champion nga si Donnie ‘Ahas’ Nietes (33-1, 19KOs) modepensa sa iyang WBO light flyweight title batok sa lig-ong Mexican challenger nga si Carlos ‘Chapito’ Velarde (26-3, 14KOs) sa main event sa Pinoy Pride XXVIII sa Nobiyembre 15 didto sa Waterfront Cebu City Hotel and Casino.
Laraw ni Nietes, 32-anyos, nga mokulit og kasaysayan isip labing dugay nga world boxing champion pinaagi sa pagbuak sa rekord ni boxing legend Gabriel ‘Flash’ Elorde, kinsa nahimong kampiyon sud sa pito ka tuig ug tulo ka buwan.
“He (Velarde) hasn’t signed the contract yet but we negotiated with Zanfer Promotions of Mexico and he will be the one who will be challenging Donnie,” matud pa ni ALA Promotions President ug CEO Michael Aldeguer.
Si Velarde, usa ka former world title challenger dihang nakigsangka siya ni Japanese Ryo Miyazaki alang sa WBA minimumweight title niadtong Agosto sa miaging tuig, apan napilde pinaagi sa fifth round TKO didto sa Osaka, Japan.
Human niana, si Velarde mikulit og tulo ka sagunsong daog. Sa katapusan niyang sangka, si Velarde mipilde sa iyang kababayan nga si Jose Argumedo aron makuha ang bakanteng IBF latino minimumweight title.
Matud ni Aldeguer nga dili kakompiyansaan ang Mehikano tungod kay rank No. 10 kini sa WBO ug nagtinguha kini sa pagpalagpot ni Nietes sa iyang trono.
Gipahibalo sab ni Aldeguer ang pagpanalipod ni undefeated ‘Prince’ Albert Pagara sa iyang IBF Intercontinental super bantamweight belt batok sa mandatory challenger nga si Raul Hirales sa Mexico sa mao gihapon nga fight card. (BANAT NEWS)