CEBU, Philippines – Lima ka boksidor ubos ni Thai boxing patron Naris Singwangcha ang mobida sa “Pinaksitay sa Talisay,” karong Sabado sa gabii didto sa Talisay City Sports Complex.
Ang maong boxing card nga gipasiugdahan sa Naris/Wakee Promotions sugdan sa alas-7 sa gabii.
Sa main attraction, si Aguelo A. Singwangcha sa Maasin City makigbatok ni Bonnie Makiling sa Bukidnon sa 12 ka hugna nilang sangka alang sa Asian Boxing Federation (ABF) super featherweight championship.
Ang 26-anyos nga si Aguelo (21-10-2, 13KOs) maninguhang modaog human mapilde pinaagi sa “unanimous decision” ngadto sa Mehikanong si Sergio Thompson niadtong Agosto 8 didto sa Chetumal Quintana Roo, Mexico.
Upat ka teammates ni Aguelo mopakita sab sa ilang abilidad sa maong promosyon nga giabagan sab sa Sugbuanong promoter nga si Rex ‘Wakee’ Salud ug sa Talisay City Sports Commission.
Si Canoy J. Singwangcha sa General Santos City makigsinukliay og kumo ni Ryan Bahala sa Davao City, si Boyose A. Singwangcha sa Cebu City makigsangka ni Jaime Barcelona sa Bukidnon, Valero G. Singwangcha sa Mandaue City mosukod sa abilidad ni Arlon Batingal sa Compostela Valley ug si Tabanao J. Singwangcha sa Panabo City makigharong ni Jhoas Aparecio sa Bukidnon.
Gawas sa tulo ka curtain-raisers, ang laing atngan sa maong boxing card mao ang away sa featherweight match tali ni Recky Dulay sa Yolly Alfante Stable ug Anthony Sabalde sa Cebu City. (BANAT NEWS)