CEBU, Philippines – Wala damha nga moabante ngadto sa finals ang Chick@Phil 89, usa sa mga huyang nga teams sa Division B apan nagpakita'g milagro dihang ilang gipalagpot ang kanhi walay pilde-pildeng Belo Men 98 sa iskor, 39-34 sa The Avenir Cup SHAABAA 19th Season semifinal game kaniadtong Huwebes sa gabii didto sa Sacred Heart School Old Campus sa dan Gen Maxilom avenue, ning dakbayan.
Maoy ikasangka sa Chick@Phil 89 ang mas paborito ug title contender nga RDAK Transporters kinsa naka-ipsot batok sa Echo Appliance, 34-32 sa usa ka kulba-hinam kaayong duwa.
Si Theogene Lim may nangu sa Chick@Phil 89 sa iyang 14 puntos samtang walay naka-iskor og double figures alang sa Belo Men 98 human igo lang mohimo'g otso puntos si Conrad Ang ug midugang silang Christopher King ug Valiant Ngo og siete puntos matag usa. Sa laing bahin, si Cecilo "Boylit" Gillamc III maoy nagbaswat sa RDAK human siya moposa og 17 puntos.
Ang Echo Appliance gipangulohan ni Serge Go Bui sa iyang 12 puntos. (BANAT NEWS)