CEBU, Philippines - Gipahigayon kagahapon sa kaadlawon ang Bike ug Fun Run nga gipasiugdahan sa Cebu Provincial Police Office (CPPO) nga gisalmotan sa nagkalain-laing unit sa kapolisan didto sa Capitol grounds.
“Magbiseklita, Tumakbo Para sa Kapayapaan at Mabuting Kinabukasan ng ating mga Kabataan,” maoy tema sa maong kalihukan.
Gitambongan kini ni Police Regional Director Chief Supt. Tom Bañas.
Matud ni Senior Supt. Noel Gillamac, Provincial Director sa CPPO nga usa ka physical fitness program ang ilang gihimo agi’g suporta sa Police Regional Office-7 sa ilang kampanya batok ilegal nga drugas.
Gawas niini, tumong usab sa maong programa mao ang pagpahibawo sa kabatan-onan labot sa dili maayong epekto sa ilegal nga drugas.
Dili momenus 400 ka mga partisipante ang misalmot sa maong talagsaong kalihukan.
Sumala pa ni Gillamac nga nagmalampuson ang ilang sunod-sunod nga operasyon tungod sa gipakitang suporta sa komunidad sa ilang kawsa batok sa ginadiling drugas. (BANAT NEWS)