Usa si Atty. Baldomero Estenzo sa mga sports official sa Pilipinas nga mitambong sa General Assembly meeting sa Asian University Sports Federation (AUSF) kaniadtong Agosto 26 didto sa Qindong,China.
Si Atty. Estenzo kinsa board representative sa Cebu Schools Athletic Foundation, Inc. (CESAFI) nga nag-representar alang sa University of Cebu diin siya maoy Dean sa UC College of Law, opisyal sab sa Federation of School Sports Association of the Philippines (FESSAP) ug usa ka accredited member ang CESAFI.
Didto sa maong meeting, nga maoy ikawalong General Assembly meeting sa AUSF, nalipay kaayo si Atty. Estenzo tungod sa pagrekognisar o pag-ila sa AUSF nga usa ka active member ang FESSAP.
Matud pa ni Atty. Estenzo nga kung sa higayon mosugot ang AUSF nga anhi sa Sugbo himoon ang maong international competition, ang posibleng events nga mahimong kitay host mao ang natad sa cycling, beach volleyball, golf, weightlifting ug table tennis.
Gidapit silang Estenzo didto sa General Assembly meeting ni AUSF President Dr. Zhang Xinsheng sa China ug sa secretary-general nga si Kenny Chow sa Hong Kong.
Ang maong General Assembly gitambongan sa kapin sa 30 ka mga nasud sa Asia nga nagrepresentar sa nagkalain-laing National University Sports Federation (NUSF) diin sakop sa pamilya ang FESSAP sa AUSF ug sa NUSF diin ang umbrella organization mao gyud ang International University Sports Federation (FISU).
Mitambong sab sa maong General Assembly gawas kang Atty. Estenzo isip first delegate mao silang Atty. Maria Luz Arzaga-Mendoza isip second delegate nga nag-representar kang FESSAP president David Ong isip iyang special assistant ug si Leo Luis Palacio-Mendoza isip observer.
Nagpasalamat si Arzaga-Mendoza ngadto sa AUSF Executive Committee sa ilang suporta nga gihatag o gipadangat sa FESSAP nga ilang giangkon nga sakop sa pamilya nga adunay katungod sa pagpadala og mga student-athletes ngadto sa Asian University Championship ug sa lain pang mga FISU sanctioned championship.
Gipahibalo sab ni Dr. Zhang nga ang AUSF Education and Training Center nga gipaluyohan sa Beijing Sports University, maghatag ngadto sa mga estudyante og higayon nga makasalmot sa pagpalambo sa liderato sa FESSAP kalabot sa ilang youth scholarship program activities alang sa mga estudyante, mga maestro, sports officials ug mga school directors.
Didto sab sa maong General Assembly meeting si Graham Lim, ang secretary-general sa Basketball Association of the Philippines (BAP) kinsa nagkanayon nga ang ika-28 nga Summer Universiade adto ipahigayon sa Gwangju, South Korea ug usa kini sa mga topics nga gihisgotan didto sa maong tigum diin gituki ang mga lagda alang sa pagsalmot sa Pilipians sa 10 ka sports events.
FIBA World Cup. Usa pa lang ka adlaw sa pagpahigayon sa FIBA World Cup of basketball didto sa Sevilla, Spain ug sa primerong duwa sa Philippine Team o mas nailhan sa Smart Gilas Pilipinas, ato dayong na-obserbaran nga tungod sa scientific na kaayong istelo sa basketball, mas lisod gyud kita sa pagdaog didto ilabi na kay mas tag-as ang atong kontra nga bisan unsaon nato'g depensa, sila lang gihapon maoy mopatigbabaw.
Apan sa atong tres puntos nga kapildehan sa Croatia, ang no. 16 seed sa FIBA sa overtime, 81-78, makaingon kita nga dako gihapon natong dungog nga atong gihatagan og kalisud ang mas higanteng Croatia.
Sunod natong makontra mao ang Greece nga dunay tulo ka NBA players nga silang Nick Calathes sa Memphis Grizzlies, shooting guard nga si Giannis Antetokounmpo sa Milwaukee Bucks ug si Kostas Papanikolaou sa Houston Rockets.
Swerte na kaayo kung dili kita mabokya ug ang labing duol sa kamatuoran nga atong pildehon mao ang Senegal kay bisan og mas tag-as sila sa atong mga players, dili man sab kaayo sila hingigo sa gawas ug dili tanan kanila maantigo mo-dribble o modala'g bola.