CEBU, Philippines- Midaug na gyud ang University of San Jose-Recoletos Baby Jaguars human ilang gikastigo ang Don Bosco Technology Center Junior Greywolves sa iskor, 106-44 kagahapon sa sangka sa high school division sa 14th season sa Cebu Schools Athletic Foundation, Inc. (CESAFI) didto sa Cebu Coliseum.
Sa sayo pa, gilubong sab sa Sacred Heart School-Ateneo de Cebu Magis Eagles ang University of Cebu Junior Webmasters, 88-45 aron inaton ang ilang winning streak ngadto sa lima ka sagunson nga daog.
Maoy ikasangka karong hapon sa Magis Eagles ang wala pay daog nga Junior Greywolves (0-6) ug posible nga adunay mahitabong record karong adlawa--- mahimong sa pinagamay og iskor o di ba hinoon pinakadako na'g winning margin.
Sama sa ilang pagpukan sa University of San Carlos Baby Warriors sa miaging adlaw, wala makapugong ang Junior Webmasters sa pagmangtas ug sa kataas sa lupad sa kawanangan sa Magis Eagles.
Balanse gihapon ang opensa sa solo leader nga Magis Eagles bisan og duha lang sa ilang players ang mihimo'g double figures nga silang Joshua Sinclair ug Jose Piero Domnic Lonag sa ilang 10 puntos matag usa.
Bugtong si Darrel Shane Menila lang ang nakahimo'g double figures alang sa Junior 3-3 nga Junior Webmasters sa iyang 16 puntos.
Balanse sab ang opensa sa Baby Jaguars nga gipangulohan ni Marmar Rubas sa iyang 23 puntos ug laing upat ka teammates ang miposa sab og double figures.
Si Jules Grant Asignar maoy nangu sa Junior Greywolves sa iyang 18 puntos. (BANAT NEWS)