CEBU, Philippines - Miiskor sa ilang ikaupat nga daog ang Southwestern University (SWU) spikers aron moabante sa semifinal round sa Shakey’s Girls Volleyball Season 12 sa Central and Eastern Visayas leg kagahapon diha sa Aznar Coliseum, ning siyudad.
Ang SWU mitapos sa eliminasyon uban ang 4-1 nga baraha human sa ilang kadaugan batok sa St. Theresa’s College (STC), 25-14, 25-17 aron moangkon sa ikaduhang puwesto sa Bracket B sunod sa Pajo National High School (PNHS). Ang Pajo NHS nga padayon pang niduwa batok sa Mary Help of Christian School alang sa ikalima nilang duwa sa pagsuwat niini kagahapon, maoy No. 1 sa Bracket B.
Sa Bracket A, ang luna sa semifinals nakuha na sa defending champion Central Visayas leg University of San Jose-Recoletos (USJ-R) ug sa 19th Milo Little Olympics Visayas Championship University of San Carlos (USC), nga parehong nagbitbit og 3-0 nga baraha.
Ang USJ-R ug ang USC padayon pang nagbinuk-anay sa ilang baraha atol sa pagsuwat niini kagahapon pagdeterminar alang sa number 1 ug number two rankings sa Bracket A alang sa semifinal round karong adlawa.