CEBU, Philippines - Mapasigarbuhon ang Kawayan Boys nga maoy kampiyon sa 1st Lola Quirina ‘Ling-Ling’ Cabaron Tabañas Cup didto sa barangay Tomonoy, Moalboal, Cebu.
Gipilde sa Kawayan Boys ang lig-on nga Frozenthone sa iskor nga 86-85 sa finals niadtong miaging Huwebes.
Sa pasiunang duwa, ang Way Lebog team mipukan sab sa Golden Angels, 65-52 aron malangkat ang third place trophy.
Ganting salapi ug tropeyo ang nadawat sa Team Kawayan Boys.
Mitunol sa maong mga award mao sila si Hon. Albertsam ‘Dodong’ Tabañag, chairman, Committee on Sports ug tournament commissioner Rodney ‘Jet’ Tabañag inabagan sa maabtik nga barangay captain sa Tomonoy nga si Marvin Dio ug konsehal Yulo Jakosalem, ang overall tournament in-charge.
Gawas sa basketbol, may lumba sab sa bugsay sakayan nga gisalmotan sa mga mananagat sa maong barangay niadtong Agosto 11.Nakakuha sa unang dapit mao si Primo Amorado, gisundan ni Joven Gabate ug Liling Gabate nga milawig sa ikaduha ug ikatulo nga dapit. (BANAT PALARO)