CEBU, Philippines - Magbagat karong hapon ang duha ka teams sa kanhi two-time champion University of Cebu (UC) Webmasters ug ang University of San Jose- Recoletos (USJ-R) Jaguars atol sa pagbukas sa 14th season sa Cebu Schools Athletic Foundation, Inc. (CESAFI) diha sa Cebu Coliseum.
Mga duwa karon
(Cebu Coliseum)
1:00 pm
Opening Ceremonies
4:00 pm
UC vs. USJ-R (Sec.)
5:30 pm
UC vs. USJ-R (Coll.)
Nanghinaut ang Jaguars nga sa bag-ong season, duna sab sila’y batonan nga bag-ong paglaum ubos sa bag-o nilang coach nga si Agripino ‘Jun’ Noel. Iyang gipulihan ang dugay na kaayong coach sa Jaguars nga si Edito Salacut uban sa panghinaut nga ang paglahugay og transisyon maoy magtuboy kanila ngadto sa laing banner year diin upat ka higayon silang miabante sa finals.
Taud-taud nang gipangandaman ni coach Noel ang CESAFI ug gani wala sila modawat og imbitasyon sa mga tune-up games tungod kay maoy ilang prayoridad ang dakung liga.
Ang Jaguars magsalig karon sa import nilang si Quentin Luzoladio ug nilang James Earl Regalado, Renzo Thedore Senining, Kyle Lajato, Edmundo Bayhonan ug Fletcher Criss Galvez. Moabag sab ang rookies nga silang Edmundo Catipay, Iron Suano, Mark Louie Labares ug Ralph Jude Dinolan.
Sa laing bahin, ang two-time champion Webmasters moduwa nga walay import ug magsalig lang kini sa ilang mga lokal. Hugtanon nga gibarugan ni UC team manager Atty. Baldomero C. Estenzo nga dili gyud mokuha’g import kay gusto silang mahimong kampiyon nga pulos local players.
Si UC coach Roel Gomez mosalig nilang Jan Michael Auditor, bigman Johnny Sigasig, Ernesto Roche II, Justine Dacalos ug Junas Marion Misa nga pipila lang sa ilang mga pambato.