CEBU, Philippines - Nakakapyot gyud ang team Violet ug maoy miangkon sa katapusang lingkoranan sa semifinals human midaog sa taktakay nilang duwa batok sa White team, 86-81 sa SRP Sunday Club 6th Founding Anniversary League diha sa San Roque Parish gym sa Brgy. Subangdaku, dakbayan sa Mandaue.
Sayo kaayong nanginit ang Violet diin miposte sila’g 25-9 sa first period, apan mihiyos ang labaw, 27-20 sa nahabiling 4:30 sa second quarter. Nakarekober hinuon ang Violet aron tapuson ang first half, 39-31.
Milabaw ang White sa labing unang higayon, 65-64 sa pasbrek ni Gerry Hucamis sa sayong bahin sa fourth period, apan dali sab kining nabawi sa Violet sa free throws ni Aldrin Gonzaga, 66-65 ug sukad niadto kulba na kaayo ang aksiyon. Nakatabla pa ang White, 69-all sa katapusang kuwatro minutos sa duwa ug may kahigayonan pa untang molabaw, apan nakahimo sila’g mga turnovers ug nabingat pagbalik sa Violet ang labaw hangtod nakawat ang mahinungdanong kadaugan nga maoy mitukmod nila sa semifinals.
Si Gonzaga mihimo’g game-high 30 puntos, samtang si Antonio Ontong miamot og 11 puntos. Ang White gipangulohan sab ni Hucamis pinaagi sa iyang 19 puntos, sila si Alex Abaño ug Dindo Aposaga nagkumboya’g 24 puntos.
Sa laing aksiyon, ang Green team miiskor og daog batok sa Black, 81-66 sa non-bearing game.
Upat ka players ang miiskor og double figures alang sa Green sa pagpangulo ni Benjie Pelarios lakip ang unom ka 3-pointers. Si Jesus ‘B-Jess’ Bacunawa miantog og 18 puntos, gisundan ni Joy Miñoza sa iyang 16 puntos ug Carlo ‘Alo’ Amora nga adunay 10 puntos.
Si Tumongha mao sab ang nangu sa Black nga mitikdol og 19 puntos. Si Larry Lauron mitimbre’g 18 puntos.
puntos matag usa
Unang duwa:
VIOLET (86) – Gonzaga 30, Ontong 11, Pacencia 9, Flores 9, Andrew 6, Camargo 5, Sagayno 5, Gabison 4, Nelson 3, Rosaroso 2.
WHITE (81) – Hucamis 19, Abaño 14, Aposaga 10, Obijanda 9, Baloro 8, Lipogpog 8, Ona 7, Alvarado 6.
Ikaduhang duwa:
GREEN (81) – Pelarios 24, Bacunawa 18, Miñoza 16, Alo 10, Andrew Auxtero 8, Adrian Auxtero 5.
BLACK (66) – Tumongha 19, Lauron 18, Dumanon 15, Coyme 6, Benson 6, Narte 3. (BANAT NEWS)