CEBU, Philippines - Turno na sab sa lungsod sa Argao nga mo-host sa Hunat Sugbu Triathlon nga gikatakda sa Septiyembre 21.
Gipasiugdahan kini sa Cebu Parklane International Hotel uban sa lokal nga kagamhanan sa Argao ubos sa liderato ni Mayor Edcel Galeos.
Ang lumba gibahin sa standard ug sprint distances, ingon man relay competition.
Niadtong moparehistro sa dili pa ang Hulyo 21 mobayad lang og P2,300, samtang ang late registrants o niadtong magpalista human sa Septiyembre 7 magbayad na og P2,800. Ang regular entry fee nagkantidad og P2,500.
Gawas sa mga tropeyo, ang overall champions sa standard makadawat og unipormeng premyo nga P5,000, samtang ang second ug third placers mobulsa'g P3,000 ug P2,000 matag usa. Ang top finishers sa matag age-bracket pasidunggan sab sa mga organizers, samtang ang tanang finishers makadawat og medalya ug ingon man ang top three performers sa sprint race ug relay.
Makadawat sab og tropeyo ang labing dakung delegasyon ning usa ka adlaw nga kompetisyon nga pagadumalaon sa Sports and Fitness Enthusiasts (SAFE). (BANAT NEWS)