CEBU, Philippines - Nabugto ang nagkadinang upat ka daog sa Red team human sila masugamak ngadto sa team Orange, 72-60 sa nagpadayong SRP Sunday Club 6th Founding Anniversary League basketball tournament niadtong Domingo diha sa San Roque Parish gym sa Brgy. Subangdaku, Mandaue City.
Gipangulohan gihapon ni Glen 'Dodod' Colina ang Orange team nga mirehistro'g 20 puntos ug kasagaran niini gikan sa mga assists ni Jhonny Labares. Si Colina nga walay sipyat sa tanan niyang pito ka free throws, giabagan sab ni Gideon Ipili sa opensiba nga mikimada og 12 puntos.
Ang Orange alkanse og kuwatro puntos sa halftime, 35-39, apan gumikan sa kamabaw sa labaw, dali nilang nailog ang momentum sa sayong bahin sa third period kortesiya ni Colina.
Ang Red team wala na makarekober sukad niadto kay ang Orange mao na ang nikontrolar hangtod nahurot ang nahabiling mga gutlo sa duwa.
Si Bernard Arreglo miratsada'g 12 puntos aron pangulohan ang Red team, gisundan ni Glenn Ramirez nga adunay 10 puntos.
Ang Orange ug ang ilang biktima nga Red nagsawo karon sa ikaduhang dapit sa standing sa managsama nilang 4-1 win-loss records.
Sa laing aksiyon, si Abner Ona miburak og 19 puntos, samtang si Alex Abaño mitampo'g 11 puntos alang sa White nga mikulit sa ilang ikatulong daog batok sa Black, 74-71.
Ang Black gipangulohan ni Onyot Sasing, kinsa mikadlit og 14 puntos, samtang sila si Larry Lauron ug Dumanon miamot og 11 puntos matag usa.
Puntos Matag Usa
Unang duwa:
ORANGE (72) – Colina 20, Ipili 12, Ortiz 9, Tecson 9, Labares 6, Aventajado 6, Savequilla 6, Peligro 2, Menaling 2, Cariño 1.
RED (60) – Arreglo 12, Ramirez 10, Colanse 8, Castro 6, Amora 5, Fick 5, Conahap 4, Survilla 4, Miñoza 4, Migallen 2.
Ikaduhang duwa:
WHITE (74) – Ona 19, Abaño 11, Alvarado 8, Aposaga 6, Cubero 5, Obijanda 4, Lumanga 4, Baloro 4, Cabase 4, Tito 2.
BLACK (71) – Sasing 14, Lauron 11, Dumanon 11, Cabcaban 8, Chin 6, Povadora 5, Narte 5, Tumongha 3, Coyme 3, Mejares 3, Benson 2. (BANAT NEWS)