CEBU, Philippines - Ang record-breaking nga South to North (SN) 280, usa ka 280-kilometer ultra marathon race, sugdan karon didto sa Santander ug adto tapuson sa Daanbantayan inig Domingo.
Kini ang labing taas nga ultra-marathon race dili lang sa nasud, apan lakip na sa tibuok Southeast Asia.
Ang defending champion nga si Joel Cuyos modepensa sa iyang trono batok sa lig-ong kaatbang sama sa seasoned-runner nga si Tony Galon. Mosalmot usab ang mga banggiitang runners sama nila ni policeman Brian Guillen, Benedict Meneses, Noay 'Doc Lope' Lope, Edwin Colina ug Joel Ouano.
Ang kampiyon sa miaging tuig nga si Rhoda Oporto dili kapanalipod sa iyang korona, apan andam mosawo niini si Katherine Villaflor.
Adunay cut-off time nga 27 ka oras sa mga partisipante. Ang Stage 1 nahimutang sa Toledo City gym. Ang dili kaabot sa first stage dili na mahimong mopadayon pa sa lumba. Ang katapusang cut-off mahitabo sa alas-9 sa buntag sa adlaw'ng Domingo. (BANAT PALARO)