CEBU, Philippines - Duha ka Mixed Martial Arts (MMA) fighters ang magharong dili lang sa ilang kaugalingong dungog, kun dili sa ilang tagsa-tagsa ka nasud sa ipahigayong 1st edition sa Cebu Extreme League nga giuloha'g "The Beginning" sa Agosto 16 diha sa Cebu Coliseum.
Kini dihang si Lando 'Alamid' Nacua sa Yaw-Yan ArDigma Cebu makigsangka batok ni Paul 'The French' Carrere sa France gikan sa Unified Mixed Martial Arts sa tulo ka hugna nga karambola.
Si Nacua tinguhang mobangon gikan sa iyang sakit nga kapildihan atol sa labing una niyang MMA amateur fight niadtong 2012.
"Importante ni nako nga awaya. Gawas sa pagdaog alang sa akong kaugalingon, I am also fighting for my gym and my country," matud pa ni Nacua.
"Ihatag gyud nako tanan aning awaya ug sa tabang sa Ginoo, akong kuhaon ang daog."
Ang 15-bout fight card wala pa mahitsas, apan gawas sa Nacua-Carrere showdown, laing atngan mao ang heavyweight fight tali nila ni John 'Little' Dulap sa Project X ug Ronilee 'Black Bull' Castro sa Tatus Muay Thai MMA.
Laing magsangka mao sila si David 'Venum' Po vs. Roel 'Tigbas' Arcipe sa Warrior MMA, Marciano 'Wolf' Torion vs. Michael 'Undisputed' Rebayos sa Rednios Gladiator, John Dave 'Dancing Man' Epile vs. Mark 'Honey Badger' Cuizon sa Cebu MMA ug Bryan 'Scarecrow' Po sa One Cebu MMA vs. Dreamer 'Nightmare' Hong sa Project X. (BANAT NEWS)