CEBU, Philippines - Hugot ug kulbahinam nga aksiyon sa volleyball ang masaksihan sa mga Sugbuanon sa dihang ang PLDT Home DSL Philippine Super Liga (PSL)-All Filipino Conference "Spike On Tour!" Out-of-town Series mosikad karon adlawa diha sa University of San Carlos (USC) sa dalan sa Sanciangko, ning siyudad.
Unang magsangka sa alas-4 sa hapon mao ang Systema batok sa Cignal HD sa men's class, sundan sa Petron batok AirAsia sa women's division sa alas-6 sa gabii.
Magbaton og "homecourt" advantage ang Team Cignal tungod kay aduna sila'y tulo ka Cebuano players nga sila si Mike Abria, Emmanuel Luces ug Ken Abunda. Makakawat sab og pagdapit sa mga fans ang team Systema tungod kay moduwa ang actor/sportsman nga si Richard Gomez.
Sa women's division, ang AirAsia bidahan sa kanhi De La Salle University spiker Michelle Gumabao, usa ka sikat nga TV personality human sa iyang pagsalmot sa Pinoy Big Brother reality show.
"Dalawang buwan ako sa loob nang Bahay ni Kuya kaya, but I am confident na makakabalik ako. More training and effort on my part," matud pa ni Gumabao.
Sa ilang bahin, ang Petron dili sab kabintahaan gumikan kay anaa kanila ang kanhi Atenista ug karon usa na ka sportscaster nga si Gretchen Ho.