CEBU, Philippines - Ang Wipro Tigers ug ang Convergys 2 Blue Devils miiskor na sab og makabungog nga daog sa 10th CSCC E-League basketball tournament diha sa City Sports Club-Cebu gym sa Cebu Business Park.
Nagkamang ang Wipro sa pagsugod ug misutoy kini sa nahabiling mga kuwarter aron lumsan ang GGS Information Services Griffins sa iskor nga 92-38, samtang ang Convergys 2 miataki sa second half aron sab malubong ang Xerox Knights, 72-52.
Si Fritz Blanes miantog og 14 puntos, samtang si Ibhar Je del Mar miabuno’g 12 puntos alang sa Wipro nga nanginit ug sa bugnaw nilang sinugdanan.
Ang Tigers igo lang naglabaw og dos puntos paghuman sa first quarter, 16-14, apan milusad og 18-8 nga rally sa second period, dayon gisundan og 31-11 run aron inaton ang labaw ngadto sa 65-33.
Si Giovanni Taok nakaiskor sab og double figure alang sa Wipro pinaagi sa iyang 10 puntos.
Bugtong si Arniel Caputol lang ang nakahimo’g double figures alang sa GGS sa iyang 23 puntos.
Sa laing bahin, si Clifford Amarado mikandos og 18 puntos, samtang si Joselito Aranda mikabo og 14 puntos alang sa Convergys 2 nga miabante og sayes puntos paghuman sa unang 10 minutos sa duwa, 17-11.
Si Earvin Ferraren adunay 23 puntos alang sa Xerox, samtang si Jason Rosafa miamot og 14 puntos sa ilang kapildihan.
Sa lain pang mga duwa, sila si Rodello Manuel ug Ryan Paul Abordonado nagkumboya’g 23 puntos aron pangulohan ang Telstra Boomerangs ngadto sa 45-33 nga kadaugan batok sa Calltek Trojans, samtang si Sergs Al Go Bui mitimbre og 17 puntos aron pangulohan ang Author Solutions Inc. Hardbacks ngadto sa 62-56 nga kadaugan batok sa Microsourcing Bullies.
Ang Telstra nabiyaan lang og uno punto sa halftime, 21-22, apan mirumbo sa Calltek sa nahabiling duha ka kuwarter, 24-11 alang sa ilang double-digit nga kadaugan. (BANAT PALARO)