CEBU, Philippines - Gilikusan sa Southwestern University (SWU) Cobras ang Jose Rizal University (JRU) Bombers, 65-57 aron moabante sa semifinals sa FilOil Flying V Hanes Premier Cup kagahapon didto sa The Arena sa San Juan.
Ang SWU nga mitukob og 3-1 record atol sa FilOil games dinhi sa Cebu, midaog na sab sa Bombers nga ila nang gipilde sa elimination round, 72-68.
Ang sinaligang import sa SWU nga si Landy Sanjo maoy midala sa opensa sa iyang 19 puntos, samtang ang reigning CESAFI MVP nga si Mark Tallo mitali og 13 puntos.
Gikan sa tres puntos nga labaw sa first half, 29-26, ang SWU kalit lang milagsik sa third period aron moiskor og 51-38 paingon sa final period.
Ang SWU nagpaabot na lang karon sa modaog sa laing quarterfinals match tali sa Far Eastern University ug De La Salle University nga magtagakay karong Biyernes.
Si Philip Paniamogan maoy leading scorer sa JRU pinaagi sa iyang 16 puntos.
PUNTOS MATAG USA
SWU (65) – Sanjo 19, Tallo 13, Mohammed 8, Pardo 7, Goloran 6, Luz 5, Bregondo 4, Parker 3.
JRU (57) – Paniamogan 16, Asuncion 11, Abdulwahab 7, Sanchez 7, Mabulac 5, Benavidez 5, Dela Paz 4, Lasquety 2. (BANAT PALARO)