CEBU, Philippines - Pabiling way pilde si ALA Boxing Gym fighter Melvin 'Top Gun' Gumban dihang iyang gikulata ang beterano nga si Jason Egera sa main event sa ALA-Cobra 'Tunay Na Lakas' boxing card niadtong Sabado sa gabii didto sa Mandaue City Plaza Square.
Ang 24-anyos nga si Gumban mipalambo sa iyang rekord ngadto sa perpektong 17-0, 8KOs, samtang si Egera nakahiagum sa iyang ika-10 nga pilde sud sa 31 ka away.
Si Egera, kanhi WBO Asia Pacific bantamweight champion, gipaabot unta nga mohatag og lisud nga away ngadto ni Gumban, apan ang ALA Boy mipakita sa iyang kaisog aron moiskor og daog.
Gamit iyang hait nga jabs ug kusog nga kombinasyon, gilupig sa binayloay ni Gumban si Egera. Nakahatag usab og lisud nga panahon ngadto ni Egera sa pagdiskarte ang mga body shots ni Gumban.
Human sa 10 ka hugna, ang tulo ka mga hurado mihatag og 92-92, 95-94 ug 96-93 tanan pabor ngadto sa ALA fighter.
Sa supporting bout, laing ALA rising star nga si Juren Labordo (12-1, 8KOs) mipakatog sa first round ni JP Macadumpis (9-3, 3KOs) sa General Santos.
Mokumpleto sa lista sa mga mananaog mao sila si Vicente Cosido batok ni Holly Quiñones, Japanese Yuri Iriguchi batok Melchor Abcede, Junior Salvador batok Powell Balaba, Peter Apolinar batok Sonny Basanez, samtang miresulta sa "draw" ang sangka nila ni Takaoki Noma ug Aldrin Guara. (BANAT PALARO)