Pasay City, Philippines – Sa pagsugal sa iyang bakus ug ingon man kahigayonan nga malakip sa kasaysayan sa boksing, si ALA Boxing Gym champion Donnie 'Ahas' Nietes (31-1-1, 19KOs) laraw nga mo-"knockout" sa Mehikano niyang karibal nga si Moises 'Moi' Fuentes (19-1-1, 18KOs) karong gabii sa main event sa "Pinoy Pride XXV: Rematch for Glory" dinhi sa SM Mall of Asia Arena.
Si Nietes manalipod sa iyang WBO light flyweight title dungan usab sa pagsuway niya pag-angkon sa Ring Magazine Lineal championship batok ni Fuentes, kinsa iya nang gikasangka sa miaging tuig apan miresulta sa "majority draw."
"Daku gyud og posibilidad nga ma-'knockout' nako siya," matud pa sa 31-anyos nga si Nietes. Gawas sa duha ka bakus, si Nietes mosuway usab pagkulit sa iyang pangan sa Philippine boxing isip labing dugay nga world champion sa nasud. Si Nietes nagkinahanglan na lang og siyam ka buwan aron malabwan ang rekord ni boxing icon Gabriel 'Flash' Elorde. Si Elorde naghari sa world lightweight division dul-an sa pito ka tuig.
Sayod si Nietes nga dili sayon ang iyang tahas batok ni Fuentes, apan daku ang iyang pagsalig nga modaog.
Sa iyang bahin, si ALA Promotions President and CEO Michael Aldeguer nagtuo nga kini ang labing dakung sangka karong tuiga ug krusyal kini dili lang alang ni Nietes, apan lakip na sa Philippine boxing.
Sa supporting main event, si Milan 'El Metodico' Melindo (30-1, 12KOs) manalipod usab sa iyang WBO International flyweight championship batok ni Mexican Martil 'Diablo' Tecuapetla (11-5, 8KOs)
Sa laing sangka, si Rey 'Boom Boom' Bautista (34-3, 25KOs) misaad nga bangonon niya ang iyang karera sa unang away niya sa lightweight division batok ni Mexican Sergio 'El Cuate' Villanueva (26-3, 13KOs).
"Nalipay ko sa tsansa nga gihatag aron makabalik ko sa ring ug wala ko'y plano nga usikan kini," sumala pa ni Bautista.