CEBU, Philippines -Sa gihapon, miresulta na sab sa "scoreless draw" ang duwa sa Philippine Azkals ug Malaysia Tigers atol sa "Face Off 2" niadtong Domingo sa gabii didto sa Cebu City Sports Center (CCSC) football field.
Kini ang ikaupat nga higayon sukad niadtong tuig 2012 nga ang Azkals ug Tigers nagtabla sa ilang mga friendly matches.
Inay modaog, naglisud pa hinuon ang Azkals nga naluwas ni rookie goalkeeper Patrick Deyto sa kapildihan human nasawo niini ang penalty goal ni Mohd Safee Mohd Sali sa Malaysia.
Hinuon, bisan pa niini, si Malaysian coach Kim Swee Datuk Ong miingon nga daku og kalambuan ang nakita niya sa Azkals itandi sa nangagi nilang mga sangka.
"The Philippines played better in terms of moving the ball and their level of confidence is good motivated by the crowd. They pushed us very hard, but the boys defended well," matud pa niya.
Kontento ra usab si Azkals coach Thomas Dooley sa gipakita sa iyang mga batos ilabi na nga misuway kini pagpasulod sa ilang goal sa first half. Ang Azkals mihimo'g 10 ka attempts. (BANAT PALARO)