CEBU, Philippines - Parehong nagbitbit og 2-0 nga baraha ang Lancers BC ug Dragons sa Coca Cola PBA Youngstars Basketball Tournament didto sa Lux Oriens Gym, SHS-Ateneo de Cebu sa barangay Canduman, Mandaue City.
Ang Lancers midaog batok sa Eagles Ballclub, 52-34 sa unang adlaw, dayon midaog sab batok sa Panthers BC, 60-47 aron magsolo sa Group A.
Sa laing sangka sa Group A, ang Cebu Warriors milubong sa Ormoc, 81-55, samtang ang Eagles BC nakarekober pinaagi sa pagpilde sa Ormoc, 62-56.
Sa Group B, ang Dragons midaog batok sa Cebu Elite, 61-56, samtang midaog sab ang Liloan batok sa One on One, 68-60.
Ang Lancers nga maoy lider sa Group A, gisundan sa Cebu Warriors (1-0), Eagles (1-1), Panthers (0-1) ug Ormoc (0-2). Sa Group B, nag-una sab ang Dragons, dayon ang Cebu Elite (1-1), Liloan (1-1), CFGA (1-1) ug One on One (0-1).
Ang Coca Cola PBA Youngstars Basketball tournament anaa na karon sa ilang ikatulong tuig diin naglambigit kini sa grassroots ug youth program.
Ang maong torneyo gipaluyohan sa Philippine Basketball Association ug Coca Cola. (BANAT PALARO)