CEBU, Philippines - Napanglantawan ni Mexican legendary trainer Nacho Beristain nga mopatigbabaw si Manny Pacquiao sa sangka niini batok ni Timothy Bradley tungod kay padag-on kini sa mga hurado.
Si Beristain nagkanayon nga dili na kinahanglan og dominanteng kadaugan ni Pacquiao tungod kay segurado kini nga modaog kun sikit gihapon ang resulta sa sangka nila ni Bradley sama sa una nilang panag-abot niadtong 2012.
Si Beristain, ang trainer ni Juan Manuel Marquez, nagtuo nga bawion sa mga hurado ang unang resulta sa sangka sa duha diin si Bradley ang midaog pinaagi sa usa ka kontrobersyal nga split decision.
"I do not think Pacquiao needs this murderer’s instinct that everyone is talking about, but he does need his speed and he has to press a little. He will win, but the judges will tell you otherwise," matud pa niya sa boxingscene.com.
Supak si Beristain sa dagan sa mga mahitabo diin posibleng magsangka pagbalik si Pacquiao ug iyang boksidor nga si Marquez.
Si Marquez gikatakdang moaway batok ni Mike Alvarado sa usa ka title eliminator sa Mayo.
Dugang pa niya nga napamatud-an na ni Marquez nga siya ang mas kusgan batok ni Pacquiao. Apan kun gusto gyud ni Marquez nga moretirong kampiyon dili niya kini pugngan sa subling panag-abot niini ni Pacquiao. (BANAT PALARO)