CEBU, Philippines - Modagan na karon si Mary Joy Tabal sa 2014 Paris International Marathon uban ang paglaum nga makahatag og dungog sa nasud nga Pilipinhon.
Ang bag-ong reyna sa National Milo Marathon ug Cebuana running queen nga si Tabal ubanan sab ni veteran Pinoy runner Eduardo Buenavista.
"Medyo excited na gamay and worried pud gamay. Excited sa ako mga makontra, new challenge for me, world-class athletes and marathoners na gud ni. Worried gamay kay nag-adjust og dali-dali sa time and weather," matud pa ni Tabal sa The Freeman, ang igsuong mantalaan sa Banat News.
Ang 24-anyos nga si Tabal miangkon nga naglisud siya og adjust sa klima sa Paris tungod kay dili siya panington tungod sa kabugnaw.
Bisan pa niini, ang pambato kaniadto sa Southwestern University (SWU) nagkanayon nga dili siya mosibog ug ihatag niya ang tanan aron molampos sa maong lumba.
Nakita ni Tabal nga daku ug talagsaong kahigayonan alang kaniya nga makasalmot sa Paris Marathon ug iya kining pahimuslan.
Sila si Tabal ug Buenavista gipadala didto sa Paris sa Nestle Philippines human sa ilang kadaugan sa men's ug women's premier division sa National Milo Marathon niadtong Disyembre sa miaging tuig. (BANAT NEWS)