CEBU, Philippines - Nahubuan sa iyang WBO minimumweight title si Merlito ‘Tiger’ Sabillo human siya gipaundang sa Mexican nga si Francisco Rodriguez sa 10th round sa ilang sangka kagahapon didto sa Arena Monterrey sa Nuevo Leon, Mexico.
Ang mas batan-on nga si Rodriguez migawas nga mas agresibo kaysa ni Sabillo diin gibanatan sa Mexican ang ALA Boxing Gym fighter sugod pa lang sa away.
Nakahimo pagpatumba si Rodriguez ni Sabillo sa hinapos nga segundos sa away human sa solidong kombinasyon sa ulo ug lawas sa Pinoy.
Gipadayun sa Mexican boxer ang iyang kabangis ug misamot iyang kaagresibo nga mipapugos ni Sabillo sa pagsandig sa pisi.
Ang lumad nga taga-Toboso, Negros Occidental nakadawat og grabeng kastigo sa wala pa pakusgi ni Rodriguez ang atake sa 10th round.
Wala na makahimo pa pagtubag si Sabillo sa atake sa Mexican fighter nga maoy nakapaaghat ni ALA trainer Edito Villamor nga undangon ang away. Dali ra nga gigakus ni referee Eddie Claudio si Sabillo aron pagtapos sa away sa 1:50 sa maong round.
“Ang health ni Merlito akong concern. Merlito is taking too much punch. Congrats to Rodriguez he is a strong fighter,†matud pa ni Villamor.
Si Rodriguez misaka sa record nga 13-2, 10KOs, samtang si Sabillo nakatilaw sa labing una niyang pilde sa 24 ka away.
Si ALA Promotions CEO and President Michael Aldeguer miingon nga makigsulti siya ni Sabillo inig abot niini sa Pilipinas aron planohon kun idayun ba nila ang usa ka rematch. (BANAT SPORTS)