CEBU, Philippines - Nakalingkawas ang University of the Visayas (UV) Green Lancers sa overtime human nila maihaw ang University of San Jose-Recoletos (USJ-R) Jaguars, 83-79 sa ikaduhang adlaw sa Cebu City Mayor’s Cup Inter-Collegiate basketball tournament kagabii didto sa Cebu Coliseum.
Mga duwa karon
(Cebu Coliseum)
5:30 pm -- USC vs. USJ-R
7:00 pm -- UV vs. San Beda
Ning pagsuwat, padayon pang nagbinuk-anay sa ilang rekord ang San Beda batok sa University of San Carlos (USC) Warriors. Ang duha pulos nagbitbit og 1-1 nga baraha ug ang modaog daku'g kahigayonan nga makampiyon sa maong torneyo.
Naglabaw ang Jaguars og 15 puntos, 41-26 sa nahabiling sayes segundos sa wala pa ang halftime break human sa three-pointer ni Tyronne Suano, apan mitubag dayon og 7-0 run ang Lancers pagsugod sa third quarter aron mosikit, 34-41. Hinuon, wala gyud nila mailog ang labaw tungod may misukli sab ang Jaguars og 7-0 run sa uwahing bahin sa third period aron mabuak ang panagtabla, 55-all sa katapusang 1:29 sa maong quarter gikan sa triple si Leonard Santillan.
Padayong misikit ang Lancers sa fourth period ug nailog nila ang labaw human sa lay-up ni John Abad, 71-70 sa 3:28 ang nahabiling oras.
Sa uwahing bahin sa fourth period, na-fouled out na ang duha ka imports sa Jaguars nga silang Quentin Luzoladio ug Emmanuel Odulla nga maoy naghatag sa Lancers og bentaha.
Ang duha ka free throws ni Abad maoy naghatag pagbalik sa Lancers og usa ka palito nga labaw, 75-74, apan nakaiskor og split charities si Mark Mutya alang sa Jaguars aron ihatod ang duwa sa overtime human magtabla, 75-all.
Si Abad maoy nangu sa Lancers sa iyang 24 puntos samtang si Raymond Catipay maoy nangu sa Jaguars sa iyang 18 puntos. (BANAT NEWS)