CEBU, Philippines - Modepensa na sa iyang bakus si Merlito 'Tiger' Sabillo uban ang paglaum nga modaog.
Si Sabillo (23-0, 12KOs) manalipod sa iyang WBO minimumweight title batok ni Mexican challenger Francisco 'Chihuas' Rodriguez (13-2, 9KOs) didto sa Arena Monterrey sa Nuevo Leon, Mexico.
Magpas-an og lisud nga misyon si Sabillo tungod kay moaway siya sa labing unang higayon sa Mexico, apan kompiyansa siya nga makahimo'g impresibong daog atubangan sa mga Mexican fans.
Atol sa weigh-in kagahapon, ang garbo sa Toboso, Negros Occidental mitimbang og 104.5 lbs., samtang si Rodriguez adunay 105 lbs.
"Salig ko sa mga judge pero gusto gyud ko og convincing nga daog," matud pa ni Sabillo.
Kini ang unang higayon nga depensaan ni Sabillo ang iyang bakus sa balwarte sa kontra human sa duha ka malampuson niyang title defense niadtong miaging tuig batok nila ni Colombian Jorle Estrada didto sa Solaire Hotel sa Parañaque ug Nicaraguan Carlos Buitrago didto sa Araneta Coliseum.
"I am confident with Merlito. Nag-ensayo gyud siya og sakto ani nga away," matud pa ni ALA chief trainer Edito Villamor. "Sabillo has a heart of a champion maong salig ko nga madepensaan niya ang bakus."
Si Sabillo ang usa sa duha ka world boxing champions sa ALA stable sunod sa laing Negrense nga si WBO light flyweight title-holder Donnie 'Ahas' Nietes. (BANAT NEWS)