CEBU, Philippines - Dakung upset ang nahitabo kagahapon dihang gipukan sa University of San Carlos (USC) Warriors ang 2013 Cebu Schools Athletic Foundation Inc. (CESAFI) title-holder University of the Visayas (UV) Green Lancers, 70-65 sa unang adlaw sa Cebu City Mayor’s Cup Inter-Collegiate basketball tournament didto sa Cebu Coliseum.
Ning pagsuwat, padayon pang nagsangka ang University of San Jose-Recoletos (USJ-R) Jaguars batok sa 2013 NCAA four-peat champion San Beda Red Lions.
Ang Congo national nga si Toyambe Spoer maoy bayani sa Warriors, kinsa miiskor og 10 puntos sa uwahing bahin sa fourth period alang sa iyang 16 puntos samtang ang laing import nga si Katak Ibrahim miamot og siyete puntos.
Maayo sab nakaduwa si Charles Pepito, ang bugtong lokal player sa Warriors nga mitampo'g 12 puntos.
Dominado sa Warriors ang duwa tungod kay nakahimo sila paglabaw og nuybe puntos, 48-39 sa nahabiling 43 segundos sa third period, apan naapas ra sab gihapon kini sa Lancers aron sakmiton ang tres puntos nga labaw, 60-57 sa nahabiling 3:32 sa duwa human sa free throws ni Jean Mpoma.
Nailog pagbalik sa Warriors ang bentaha, 61-60 ug wala na sila motugot nga makalabaw pa ang Lancers.
Sa preliminary, midaog ang Team Cebu ni Mayor Mike Rama batok sa Team Bogo ni Mayor Celestino E. Martinez Jr. sa iskor nga 100-94.
Si Rama miburak og 47 puntos, lakip na ang 13 ka three-pointers aron pangulohan ang iyang koponan. Gisundan ni Danny Aying, kinsa miposa og 23 puntos, samtang si Ope Abellana miamot og 13 puntos.
Lima ka players sa team Bogo ang mibahog og double figures, apil na ang anak ni Mayor Martinez nga si Tining, kinsa miiskor og 14 puntos.