CEBU, Philippines - Nagmangtas na sab ang "Batman and Robin" sa team Lim nga silang Glenn Birao ug Erwin Ferrer diin nagkumboya sila og 49 puntos aron pangulohan ang koponan paglansang og laing daog batok sa team Bastida, 99-96 sa nagpadayong aksiyon sa As-Es-B.A.R. First Conference basketball tournament didto sa Benjamin Solon Memorial Gym sa Brgy. Cogon Ramos, Cebu City.
Human magtabla sa first quarter, 28-all, ang team Lim sa tandem nilang Birao ug Ferrer milusad og mainitong rally sa second period aron inaton ang labaw, 57-40 sa halftime. Apan nahilis ang dakung bentaha dihang nagtambayayong sa opensa ang mga sinaligan sa team Bastida nga silang Louie Tanggol ug Reynolds Zamora. Higayon na unta kadto sa team Bastida nga mailog ang momentum, apan ang kanhi CSAT Builder nga si Zamora mipahuway pagsugod sa fourth quarter hinungdan nga nadaog sa team Lim ang duwa.
Si Nilo Dan-Dan mitampo og 12 puntos alang sa ikaduhang sunod-sunod nga daog sa team Lim.
Ang napildeng team Bastida gipangulohan ni Tanggol nga mipuga'g 32 puntos, samtang si Zamora adunay 28 puntos, gisundan ni Rocky Bacalso nga adunay 10 puntos.
PUNTOS MATAG USA
TEAM LIM (99) - Ferrer 32, Birao 17, Dan-Dan 12, Alesna 8, Cabrera 8, Tañajora 6, Ferrer 4, Jurado 4, Magsayo 2, Abelgas 2.
TEAM BASTIDA (96) - Tanggol 32, Zamora 28, Bacalso 10, Pada 8, Godiz 6, Lanutan 5, Sabay 4, Bastida 4, Aniñon 2. (BANAT NEWS)