CEBU, Philippines - Gikatakdang moabot dinhi sa Sugbu ugma ang reigning NCAA champion San Beda (SB) Red Lions alang sa Cebu City Mayor’s Cup Inter-Collegiate Basketball Tournament sa Marso 21-23 diha sa Cebu Coliseum.
Sangkaon sa San Beda ang 2013 CESAFI champion University of the Visayas (UV) Green Lancers, University of San Jose-Recoletos (USJ-R) Jaguars ug University of San Carlos (USC) Warriors ning tulo ka adlaw nga torneyo nga gipasiugdahan sa Cebu City Sports Commission (CCSC) ubos sa liderato ni Edward Hayco.
Ang mga koponan moduwa og single round robin format. Ang team nga adunay nindot nga baraha maoy ilhong kampiyon.
Ang kampiyon makadawat og P50,000, samtang ang ikaduha ug ikatulo makaangkon og P30,000 ug P20,000 matag usa. Ang fourth placer makadawat og consolation prize nga P10,000.
Sa dili pa ang pormal nga kompetisyon, magtigi una ang Team Cebu ni Mayor Mike Rama ug ang Team Bogo ni Mayor Junnie Martinez sa usa ka exhibition game sa alas-4 sa hapon.
Mosunod dayon ang duwa tali sa USC Warriors ug sa UV Green Lancers sa alas 5:30 sa hapon. Sa main game sa alas-7:30 sa gabii, ang San Beda makigsangka sa USJ-R Jaguars.
Ang mga tiket nagkantidad og P200 sa stage seats, P150 sa ringside, P100 sa lower box, P50 sa upper box ug P20 sa general admission. Adunay 50 porsiyento nga diskwento ang mga estudyante, kinahanglan lang ipakita ang ilang student's ID. (BANAT NEWS)