CEBU, Philippines - Natuman ang pangandoy sa defending champion Alaska Aces nga moiskor og daog dihang ilang gilubong ang GlobalPort Batang Pier, 93-77 sa PBA Commissioner's Cup kagahapon didto sa Cuneta Astrodome.
Gipakita sa Alaska nga determinado sila nga mobangon gikan sa ilang kapildihan sa opener dihang mipauwan dayon sila'g puntos aron moposte'g 23-15 nga labaw sa first period. Hinuon, nanginit si Jay Washington aron ilogon ang labaw, 54-53 sa nahabiling 6:22 sa third quarter.
Ang mainitong rally sa GlobalPort maoy nakapaaghat ni reigning PBA "Best Import" Rob Dozier pagkayod sa final period uban sa suporta nila ni Gabby Espinas ug Cyrus Baguio aron molansang og 80-68 nga labaw sa nahabiling 3:11 sa duwa.
Si Dozier mibunot og 25 puntos ug 15 ka rebounds, samtang sila si RJ Jazul ug Gabby Espinas mihirit og tag-18 puntos.
Ang import nga si Evan Brock miiskor og 21 puntos alang sa GlobalPort, kinsa nagbitbit og 2-0 win-loss record. Si Washington mitampo'g 14 puntos, samtang si Alex Cabagnot miamot og 12 puntos. (BANAT NEWS)