PASAY CITY, Philippines - Kasado na. Si two-division world champion Donnie 'Ahas' Nietes (32-1-1, 18KOs) modepensa sa iyang WBO light flyweight
title batok sa Mehikanong si Moises Fuentes (19-1-1, 10KOs) sa gikahinaman nilang "rematch" nga gitakda sa Mayo 10 didto sa SM Mall
of Asia Arena.
Mao kini ang gikompirmar ni ALA Promotions President ug CEO Michael Aldeguer nga matud pa anaa na sa 90% aron
mahitsas na ang sabot-sabot nila uban sa Zanfer Promotions nga maoy handler ni Fuentes.
"I can say that Nietes- Fuentes 2 in MOA Arena is good to go," matud pa ni Aldeguer. "We haven’t signed the contract yet but
we have agreed in principles, so the fight is on."
Ang 31-anyos nga si Nietes wala na mapilde sukad niadtong 2004 ug nagtinguha karon pagbuak sa rekord ni Pinoy boxing
legend Gabriel 'Flash' Elorde isip labing dugay nga reigning world champion sa kasaysayan.
Sila si Nietes ug Fuentes unang nagsangka diin ang away miresulta sa usa ka "majority draw" niadtong Marso 13 diha sa
Waterfront Cebu City Hotel and Casino .
"This is a very important fight for Nietes as he will make history by being the longest reigning Filipino world champion," matud
pa ni Aldeguer. "I know Donnie is ready even if he will make the defense in Mexico, like what the other party first demanded."
Ang garbo sa Murcia, Negros Occidental nga si Nietes kasamtangan nga nag-ensayo sa United States ug Mexico aron
mangandam sa pakigsangka niya pag-usab ni Fuentes.
Si Nietes lab-as pa sa iyang third round knockout nga kadaugan batok ni former Mexican world champion Sammy Guttierez
niadtong Nobiyembre 30 sa miaging tuig didto sa Smart Araneta Coliseum.
Matud pa ni Aldeguer nga moaway sab sa maong fight card si one-time world champion challenger Milan "El Metodico'
Melindo (30-1, 12KOs) ug comebacking Rey 'Boom-Boom' Bautista (34-3, 25KOs) batok sa wala pa hinganli nga mga kaatbang. (BANAT NEWS)