CEBU, Philippines - Gipanglubong sa Living Word-International Bible Institute (LW-IBI) ug sa House of Hope (HOH) Slingers ang tagsa-tagsa nilang mga kaatbang aron maoy mag-abot sa 35-above division sa 4th Fellowship of Christian Athletes (FCA) Basketball League niadtong weekend didto sa karaang Sacred Heart School-Ateneo de Cebu gym sa General Maxilom Avenue, ning siyudad.
Miabante sa finals ang LW-IBI ni Pastor Mel Caparros human sa ilang 81-71 nga kadaugan batok sa Christian Workers Basketball Association (CWBA), samtang ang HOH miangkon sa katapusang luna pinaagi sa pagdemolis sa LW-South, 59-34.
Gipangulohan ni Edwin Catamco ang LW-IBI pinaagi sa iyang 15 puntos, gisundan nilang Mario Suarez ug Wellington Yu nga adunay 12 puntos matag usa.
Si Alvin Abestilla mao sab ang topscorer sa CWBA nga milansang og 17 puntos, samtang si Ronald Canoy miugkat og 14 puntos.
Sa laing bahin, si Ian Santos ug Nelson Aguilar maoy nangu sa HOH nga miiskor og 11 ug 10 puntos matag usa.
Ang LW-IBI ug HOH magsangka alang sa korona sa 35-above karong Lunes. (BANAT PALARO)