CEBU, Philippines - Mosamot kahigpit ang kompetisyon sa 2014 Charter Day Cup Invitational Basketball Tournament tungod kay ang tulo ka PBA teams nga mosalmot moparada sa ilang tagsa-tagsa ka import.
Ang tulo ka adlaw nga torneyo gitakda sa Pebrero 21-23 sa duha ka managlahing binyu.
Sa Pebrero 21 ug 23, ang duwa adto ipahigayon sa Cebu Coliseum, samtang sa petsa 22 dad-on kini didto sa Mandaue City Cultural and Sports Complex.
Isip pagpangandam sa PBA Commissioner's Cup nga sugdan sunod buwan, ang Alaska Aces, Talk ‘N Text Tropang Texters ug GlobalPort Batang Pier moduwa uban sa tagsa-tagsa nila ka import. Mokompleto sa upat ka koponan mao ang amateur squad nga Tagoloan Natumolan Tigers.
Ang defending champion Alaska mikuha pagbalik ni reigning "best import" Robert Dozier Jr., samtang ang Talk N' Text mibira ni NBA D-League standout Richard Howell ug ang GlobalPort mikuha ni NBA veteran Evan Brock.
Si Dozier maoy yawi sa Alaska sa ilang 3-0 sweep batok sa Barangay Ginebra San Miguel sa finals sa miaging tuig.
Ang kanhi draftee sa Miami Heat nga si Dozier mipakita sa iyang hait nga labok sa miaging Commissioner's Cup ug mipamatuod sa iyang abilidad isip usa ka kanhi US NCAA standout.
Si Howell sa iyang bahin, nga miduwa kaniadto sa Portland TrailBlazers gihulagway sab nga lig-ong import karon nga conference ilabi na sa rebounding, samtang ang GlobalPort nga nagtinguhang makarekober gikan sa sayong pagkatagak sa playoffs magsalig sab sa abilidad ni Brock, ang kanhi forward sa Atlanta Hawks.
Ang upat ka koponan mosunod og single round robin format diin ang makabaton og labing maayong rekord maoy kampiyon.
Ang mga tiket nagkantidad og P50 sa general admission, P150 sa upper box, P300 sa lower box, P400 sa stage seats ug P500 sa ringside
Alang sa reservations ug dugang mga pangutana, mahimong motawag sa mga numero 0922-2801830, 0943-2978831, 0917-5273888 o 2551405 ug 4029419. (BANAT NEWS)