CEBU, Philippines - Dili nato paboritong sports ang "figure skating" ug dili kaayo kini inila kun itandi sa basketbol ug boksing, apan adunay Pinoy nga angayan hatagan sa tumang pagdayeg tungod kay ang garbo sa Pilipinas nga Michael Christian Martinez nakasustenir ug miabante sa finals human siya madala sa Top 24 sa men’s figure skating competition sa nagpadayong 22nd Winter Olympics didto sa Iceberg Skating Palace sa Sochi, Russia.
Ang taga-Muntinlupa City nga si Martinez nipabilib sa katawhan sa iyang "stunning routine" samtang nagpahigayon sa iyang turno inubanan sa kantang "Romeo and Juliet" ni Arthur Fiedler.
Si Martinez nakakuha'g iskor nga 64.81 ug nalanding sa ikatulong puwesto sa unang 10 ka mga partisipante aron moabante sa sunod round sa free skate karong buntaga.
Usa ka bag-ong world record ang nahimo ni Yuzuru Hanyu sa Japan, kinsa miiskor og 101.45 puntos nga mas labaw sa three-time world champion nga si Patrick Chan sa Canada, kinsa mirehistro og 97.52 puntos.
Silang Javier Fernandez sa Spain, Daisuke Takahashi sa Japan ug Peter Liebers sa Germany maoy mikompleto sa top five.
Sa maong round, si Martinez nalandig sa ika-19 nga dapit.