CEBU, Philippines - Nagbahas dayon ang Cebu City Niños dihang mihakot kini og 21 ka gold, 18 ka silver ug 11 ka bronze medals sa unang adlaw sa ilang kampanya sa Central Visayas Regional Athletic Association (CVIRAA) Meet kagahapon didto sa Cebu City Sports Center (CCSC).
Kasagarang bulawan nga nakubit sa Cebu City Niños gikan sa swimming event ubos sa pagpangulo ni Michael Ichiro Kong nga midaog og tulo ka bulawan kortesiya sa 100-meter backstroke sa oras nga 1:08.62, 200m butterfly sa oras nga 2:25.74 ug sa 200m individual medley nga mioras og 2:27.93.
Laing naka-gold sa Cebu City Niños mao silang Karen Mae Indiaya nga adunay duha, samtang sila si Alfeo Vallespin, Maria Aaliya Suarez Biagan, Gil Antone Talisaysay, Mae Kawabata, Kyle Nemil ug Lyh Ann Navarro nga adunay tag-usa.
Ang Cebu City midaog sab og unom ka bulawan sa relay competition sa elementary ug secondary level.
Wala sab magpabitin ang Talisay City ug Mandaue City diin nakadala sab sila og daghang bulawan kagahapon sa swimming ug arnis competitions.
Ang Talisay gipangulohan ni National Milo Little Olympics Most Outstanding Athlete ug labing unang gold medalist sa swimming sa maong event nga si Psalm Deniel Aquino nga adunay 10 ka bulawan, gipakapinan og pito ka silvers ug pito sab ka bronzes.
Sa ilang bahin, ang Mandaue miarangkada sab sa arnis nga midaog og 10 ka bulawan ug usa ka silver diin ilang gilupig ang Cebu City nga aduna lay tulo ka gold, upat ka silver ug tulo ka bronze medals sa pagsugod sa maong aksiyon.
Sa athletics, ang Bohol ug ilang igsuong koponan Tagbilaran mikabkab og usa ka gold matag usa, samtang ang Cebu Province nakakuha og duha ka golds ug ang Danao adunay usa ka gold. Ang Cebu City igo lang midaog og usa ka silver ug duha ka bronze medals.
Si Jimboy Lofranco sa Bohol naka-gold sa elementary boys' shotput sa gilay-on nga 9.96 meters, samtang si Truman Castolo sa Tagbilaran nidaog sab og bulawan sa long jump (4.56 meter).