CEBU, Philippines - Ang Talk ‘N Text Tropang Texters maoy ikatulong PBA team nga molingaw sa mga Cebuano fans atol sa 2014 Charter Day Cup karong Pebrero 21-23 sa duha ka managlahing binyu.
Ang six-time PBA champion uban sa Alaska Aces, GlobalPort Batang Pier ug usa ka amateur team, ang Tagoloan Natumolan Tigers, magsangka sa tulo ka adlaw nga torneyo nga magsilbeng tune-up tournament alang sa nagsingabot nga PBA Commissioner’s Cup nga buksan sa Marso 7.
Ang Talk ‘N Text nga gitagak sa San Mig Coffee Mixers sa playoffs sa All-Filipino, tuyong mobawos sa sunod conference. Ang Texters ni coach Norman Black miduwa atol sa opening game sa Cebu Coliseum diin midaog sila batok sa ilang sister-team Meralco Bolts niadtong Nobiyembre 17.
Ang Texters bidahan nila ni Jimmy Alapag, Larry Fonacier, Ranidel De Ocampo ug Jayson Castro, kinsa moduwa alang sa Smart Gilas Pilipinas sa 2014 FIBA World Cup sa Spain sa Agosto.
Moduwa sab sa Texters silang KG Canaleta, Danny Seigle, Harvey Carey, Ryan Reyes, Jai Reyes, Noy Baclao ug one-time MVP Kelly Williams.
Ang upat ka mga contenders moduwa sa single round robin format diin ang koponan nga adunay labing daghan og daog maoy ilhong kampiyon.
Ang mga tiket nagkantidad og P50 sa general admission, P150 sa upper box, P300 sa lower box, P400 sa stage seats ug P500 sa ringside.
Alang sa reservations ug dugang pang mga impormasyon, mahimong motawag sa numero 0922-2801830, 0943-2978831, 0917-5273888 o 2551405 ug 4029419. (BANAT NEWS)